samedi 31 janvier 2009

Quand la vida reverta a som

Un cant novèl.



Aquò's coma un cant novèl

Que tindèt clar pèls capitols

Un ramelet culhit per els.

Bèl com'un liaç dins las nivols

Quora fau 'na cachavièlha.

Quand sentissi las tressusors

Que la vida reverte som.


Los mots, los cerquèri per el,

Tal un aucèl al bèc d'argent,

Que s'enauçan naut, cap al cèl,

Qu'aval, se vei pas pus las gents.

Tastar un gran de la trelha.

En oblidant las nòstras amors

Quand la vida reverta som.


Quand la vida reverta som

Amb sa dicha trufarèla,

Goudoulin ne'n diguèt quicòm,

Qu'agrada a ma comprenèla.

Nosautres la farem grelhar

En sovenir dels trobadors

An de la vida far resson


Que l'astrada venga amor

Que me daisse m'enlucernar

De la lenga, unes fòls discors,

D'unas leissons, m'assabentar

Cançons per se meravilhar.

Coma o cantèron dins sa tors

Que la vida paresca al jorn


Dius se la vida pòd naisser.

Las paraulas mòrtas, ont son?

Dels òmes que van sens raices

Vendràn una paura meisson.

Que lo vent jogue amb las fuèlhas.

Que' l fruch s'amadure un jorn

D'un borrilh qu'amaga sa flor.


mercredi 28 janvier 2009

Deman


Per que la Tèrra es l'infèrn?
Degun o pòd pas dire.
Vertat que la Tèrra es asaigada per la sang , de monde , qu'èra pas gaire pus missant que nosautres.
Dieus , o los diables cambièron la Tèrra en infèrn.
Per de que?
Degun sab pas o dire.
E la Tèrra s'acaprissa de cambiar l'òme en bèstia e l'aiga en sang.
Mas qual es lo copabla?Mostrar lo copabla qu'es Dius. Mas non qu'aquò's pas possible
Dius vòl que la Tèrra sia cambiada en flumes de sang. E lo diable l'ajuda.
Mas quand quitarran lors religions de guèrra?
Maria agacha lo cèl. Maria prèga Dius e Maria espèra que la sang s'estorirà sus la Tèrra.
E ièu qu'agachi Maria ; me disi qu'es tròp bèla Maria e que l'aimi entre qu'ela espera un sinhe dins las nivols. .

vendredi 23 janvier 2009

fat e fols


Dins la caforna de la la poesia e de la musica ambe Eric Fraj. Cançons novèlas e cançons de joinessa. Totas mai polidas las unas que las autras.
Cantèt en occitan , catalan , castilhan.
Mas d'unes encara mai polidas.
Que Fraj reverta lo bon vin. Que se melhora totjorn.
Aimèri Bodon, (la nèu sul camin ,...) e encara La Lutz una poesia subrebèla, d'un Valencian, ambe una musica originala fòrça estonanta , de sons novèls venguts de la sia guitarra.
Cal dire tanben que Thierry Roques , tira de son accordeon, o del piano ( o la polida musica de l'entama) de sons que te trissan l'arma. Cal dire tanben que lo senher Lopez , te sortis d'unes sons desconeguts , tant de sa gargamela que de sas flautas , una votz espantanta, que te faria creire que quicòm se demarga dins l'acostica enfin i a lo Tonton Remi ambe las percussions que trastolèjèt un pauc a la debuta, dabant de se desliurar d'a fons .
D'un biais que totes se "demerdan" bravament coma cal.
Mas amai del tristum, caput, trop sovent ressegaire ambe los cantaires occitans , i aguèt tanben l'umor , ( la cançon trufarèla d'un cantaire aparisenquit que perd son arma).Que foguèt pas, per astre , lo biais de Fraj.
E subretot las poesias de Fraj (que regreti de pas aver trapat los tèxtes, e son jòc de cantaire, e son interpretacion, afoganta, estrambordanta , generosa, que calcula pas per donar lo melhor .
Tot aquò que faguèt la cava comola.
I serà encara disabte al 71 de la carrièra del Taur . De pas mancar.

mardi 20 janvier 2009

poesia

Cendre Mòrta


Lòng de la comba de l'Erau.

Lo vent davala.

Dins l'argentum clar dels olius.

Flume d'oblit.


Oblit dau sèrre ont l'aucèl plora.

Dins lo silenci de la nuòch.

Ermasses vièlhs e vinha mòrta.

En l'ombra espandida dau puòg.



Ostau perdut ont lo vent sol.

Buta la pòrta.

ò darrièr pas sus lo lindau.

ò cendra mòrta.



Oblit de la darrièra luna.

detras d'un nivolàs de nèu.

vièlhas peiras abandonadas.

Als jorns e nuòchs de l'eternau.



Lòng de la camba de l'Erau.

Lo vent davala.

Dins l'argentum clar dels olius.

Flume d'oblit.





dimanche 18 janvier 2009

Arlequinada


Trach de OC vodada a M Roqueta numerò bastit per J F BRUN.


Daissa me

Daissa me anar dins mon desèrt.,
e ne descomptar las estèlas.
Daissa sanhar mos pès descauçs.
sus las arpas de sas espinhas.
Lèva me lo vent, lèva me lo bruch.
Daissa me dintrar dins ma nuèch,.
dins l'escur de la mar invèrsa.
Daissa me desgrunar lo temps.
e sos rasims de pansarilha.
E, dins la nuèch dels endemans.
sos uèlhs mols de ratapenada.

Trach de OC

vendredi 16 janvier 2009

Pintradura e doçor


De nòstre studio "manjacosteltoday" pintradura en moviment. Copyright e dreches servats.

Uèi nos cal portar lo dòl de l'esquèrra.
Gausem escriguèt lo conse de Paris . Vòlia dire gausem lo capitalisme.
Avem pas de nos trachar del monde de l'entreprèsa . Qual o diguèt? Sarkosy? Un madur de la drecha ultima . Non foguèt lo brave Lionel Jospin.
Vesi pas ço que pòdria pas estre privatisat . Qual o diguèt : Lamic (ps tendencia OMC)
Soi fièr d'aver privatisat Renault que lo sauvèri. Qual o diguèt Balladur? Non Rocard ( Ps tendencia colhaud).
Cal pas espaurugar lo monde de la finança. Qual o diguèt? Ròtchild ? Non Strauss Khan(tendencia FMI).
Lo governament dèu de contunhar de s'atacar als avantages aquesits . Qual o diguèt ? Madoff, Minc, Benoist XVI,lo cap de la mafia ? Non Attali Attala, Atila.
La guèrra es inevitabla ambe l'Iran . Qual o diguèt? Condolizza Rice?Netanhaou? Non Koutchener.
Ai pas vergonha de me trachar del ministèra de l'Identitat nacionala: Hortefeu?Le Pen? Non Besson.
Fraternité fraternité, amour . Qual o diguèt? ..... Royal (que degun ne'n parlèt pas endacòm mai) .

E aici bas , dins Occitania? quals se prepausan de pagar dusca perpèta pel TGV, alara que los trens de las linhas segondarias rotlan a quarante quilomètres per ora ,e s'arrestan mai que mens dins las garas que tampan?
Vos daissi trobar la responsas.
Vergonha vergonha vergonha .
Un còp èra, a esquèrra, d'unes los aurian sonats :" varlets del capitalisme, o venduts" , mas la vertat es endacòm mai, pus triste tanben , direm que ne'n son pas que los bestiassons e las moninas. Las ombras dins las cafornas.
JAURES TORNA LEU

mercredi 14 janvier 2009

Lo monde dels trobadors.


Linda M Paterson qu'es professora a l'universitat de Warwick , e qu'es una brava savantassa , escriguèt aquel libre , sus la sociétat medievala entre las annadas 1100 e 1300.
S'es estacada de soslinhar las diferencias qu'i aguèt entre la societat d'Oil e la d'Oc .

Un libre que daissa soscadis e un gost amar.
Que mostra mai fòrt lo saber de L M Paterson , mas que a flor e a mesura, e gaireben dins totes los articles, s'estaca de fach( sai que sens o voler) a mostrar qu'i avia pas cap de diferencia entre las doas sociétats . E que tre que troba una qualitat especifica a la civilisacion mièjornala , troba sul pic un contra exemple qu'escafa subte l'idèa, lo meriti , l'avantage, que poira se trobar quicòm de mai, e ditz qu' i avia quicom de parièr al Nòrd , veire quicòm de milhor. Ièu me pensi per exemple al cas de la jasilha , que per astre i a un catalan qu'escriguèt plan çò que vejèt , vist que passèt la majora part de sa vida dins Occitania. Levat que per un còp que i a d'escriches , nombroses , L M Paterson , se remembra , l'importancia de l'Italia , e lo biais de far de las noiriças françèsas, melhor de segur.
D'un autre part quand ensatji d'analisar , la desfacha del miètjorn , la trobi pas clara , qu'escriu , que la societat feodala dins Occitanai èra mens somesa al poder de sa noblessa, e lo comte de Tolosa . E per exemple , que e las vilas èran mai liures que dins lo nòrd . Mas d'un biais aquò's mena clarament a l'idèa d'obediança. Auria pogut dire qu'èra mervelhos que las ciutats capitèron de se desliurar tan lèu de la noblessa e de las gleisas. Mas o dira pas jamai.
Meteissa causa per las femnas que levat la de la granda noblessa èran pas mai liuras qu'al Nòrd.
Levat qu'al nòrd l'espos podia batre la sia femna sens ren demandar a degun... E o fasia sens se genar tant e pus que dins lo miètjorn.
Tot es del meteis biais.
Levat la conclusion susprenanta que dis: Que i auria agut "une relativa propension d'escambiar ambe los estrangièrs" qu'u auria agut une relativa sujestion , entre aristocrates , cavalièrs que pareisson estre pas que de salariats, e aco dels païsans pareisson mai liurtes qu'endacòm mai...q
I aguèt una moblitat sociala mai qu'en França. Ls femnas pareisson mai liures . I aguèt una tolerancia per las cresenças religiosas diferentas "
L'Occitanie n'était ni utopique, ni à l'abri du péché originel , mais ce fut la première victime spectaculaire d'une société persécutrice en formation , la victime d'étrangers avides de domination et d'autorité.

Cò que legiguèri jamai endacòm mai dins aqueste libre.... Mas vai te'n saupre Joaneta...

lundi 12 janvier 2009

Omenatge a Robert Lafont lo gigant


Per escotar R Lafont parlar de la cançon Normanda de Rotland , escricha per un monge aragones , de Ròde, qu'aparava l'emperador, e pas cap los capecians usurpaires , e encara per cambiar la dralha del peregrinatge de Compostela ,e que se dansava pareis a l'entorn de la gleisa de Conques, la cançon de la crotsada, compausada a l'entorn de Conques , coma lo modèla de las gleisas romanas.
Que Lafont ditz sens malvolença , que lo primièr escrich de la literatura françèsa, es Normand , e que se troba dins Anglatèra, e que dins la cançon de Rotland existis pas lo Rotland dins l'original, senon subreempegat pels capecians.
E que la batalha se debanèt pas dins Navarra mas al Sompòrt, pòrt que ven de P'R , que vòl dire per, pro, par, e pòrt ; e dona tanben percar , segond que lo son representa lo geste , troba de Robert Lafont

samedi 10 janvier 2009

Paradis e aucèls

Aucèls de paradis.

A l'origina de la creacion, i avia l'aucelum, maites aucèls de tot costat, dins los bòsses , las pradas , las montanhas . Erem a la debuta del monde , davant que l'òme davala de son aubre per marchar sus las patas de darrèr .
E tre davalat l'òme s'espandiguèt sus la Tèrra , e espeliguèt dusca dins los ròdols los pus oblidats.
Tant e mai , captitèron, que d'unas parlèron d'una quitia raça pichona d'òmes sus una isla , benlèu l'Indonesia . L'adaptacion que !
Puèi l'òme i anèt per copar los aubres , de tot son vam, e que ne'n copèt tant e mai que ne'n demorèt pas gaire.
E los aucèls paures moriguèron de lassitge qu'avian pas cap de brancas per se pausar, que i avia pas pus d'aubres.
Alara los aucèls desapareiguèron , d'en primièr los de totas las colors.
E lo monde venguèt gris . E lo solèlh s'atudèt . E alaras los savis e los subreviudants sabèron lèu que lo monde anava de morir. E que demandèron als enfants de dessenhar lo cèl e las colors per lo sauvar. Mas n'en avian pas cap lo remembre.
Lo darrièr aucèl foguèt un pipach roge , lo darrièr invern. Sautèt sus la taula rosigada pels vermes , d'un ostal vièlh , a l'abroa de l'Ocean , per cercar qualquas micas oblidadas de l'estiu. Ne'n trobèt pas una.
Sos darrièrs mots foguèron : e ben paures los òmes an pas finit de patir . Que sabia plan que la mòrt de l'aucelum èra quasiment la mòrt de l'òme .

jeudi 8 janvier 2009

shalom



700 mòrts , 4000 nhafrats. D'enfants de femnas , de vièlhs. E gaireben pas cap de soldats del Hamas.
Totjorn la meteissa istòria , lo pòble que paga per l'orgulh dels poderos.
Benlèu un biais de forçar Obama e de la guèrra contre l'Iran.
En esperant Gaza reverta de mai en mai lo remake del guetò de Varsovia? Dusca à quicòm que pudis l'aparteid raciste de l'Africa del Sud d'un còp èra.

lundi 5 janvier 2009

Bel amant e fin Amor


Trach de A Jeanroy(les joies du Gai savoir) e que se troba dins lo libre de R Lafont istoria e antologia de la literatura occitana.

Bel Amant e fine Amor 1373

De far un vers soi eras ben d'accòrd.

per fina amor, pensant del gai Saber.

car e subtil, que dona grand plaser.,

Als aimadors jòi, solaç e depòrt.

E cel que vòl d'amor prètz conquistar.,

en tots sos fachs deu vicis esquivar.,

amant de còr verai, e gent servir.

e mercejar sidòms, e 'ls bens grasir.,

sufrent los mals, car esnaprès afans.,

amb bon esfòrç pòt èsser benanants.



Qui vòl d'amor lèu venir a bon pòrt.

non vuèlha dir a negun son voler.

ni declarar çò que 'lh pòt dam tener.

car fòls parlars sovent percura mòrt.:

savis es doncs qui fug a fòl parlar.

e fòls qui ditz çò que fai a celar.,

e qui sos jòis secrèts non sap tenir.

e'ls mals e'ls bens passar amb gent cobrir.

non sèc lo cors que far deu fin aimants.

que vòl sofrir en patz los pros e'ls dams.

samedi 3 janvier 2009

Adam e Eva


Bona annada plan granada e bona santat....
E tanben solidaritat en 2009 .
S'ajudem pas las bancas qual o farà? Vos demandi.
Une novèla praquò. En furgant lo Riff , un scientific trobèt aquela pintradura rupestra dins lo rodol ont estatjava la Lucia
Adam èra pas sol ambe Eve coma o nos dison al catechirme , que n'i avia una autra femna . Lo scientific cerca lo nom d'aquela femna que fa "l'coscos e que par darrèr fa coco".
Avem comprès per que Dius lo puniguèt e nosautres tanben.
Que se cadun fasia coma aquò ,caldria que naissèsse dos còps mai de femnas que d'omes ço qu'es pas previst , e que lo metèt dins una rabia qu'es pas de creire.
Per dire qu'i avia pas cap de poma dins aquela istòria...
E qu'Adam èra femnassièr.