tretze

Tretze Antonin Perbosc Contes Atal letras d'Oc

Treze abans de ganhar la bèla renomada
que l'a fach immortal
s'apelava pas brica atal;.

mas son nom vertadièr es causa debrembada,
desempèi tant de temps qu'a quitats los esclòps .
Se ditz que la nuèch de sas nòças
baisèt sa femna tretze còps.
Los òmes d'alavetz , a ! n'èran pas de ròssas
per l'òbra que se far devath lo cubricèl;
trobèron ça que la lo prefach subrebèl:
aquò passava l'òsca ! aquel n'avia de fetge!
Aqui cossi se far que l'apelèron Tretze,
e aquel escais nom tombèt pas d'aqui enlà.

Sa femneta del còp èra tota gauchosa.
Las autras se disian: " Mon Dius! la crebarà!"
mai d'una , se pòt plan , amor qu'èra gelosa
e cobesa d'un tant polit sòrt... Cò que i a ,
aquò's que, sia per èstre estada tròp baisada
o sia per quicòm mai, la jove maridada,
pecaire, moriguèt abans la fin de l'an.

Tretze, ni mai ni mens, èra un simple pacan
que per tota fortuna avia pas qu'una marrida
bordeta ont s'esquintava en fasquent magra vida,
manjant mai que res plus sopas e pan golsat
e beguent rèire-vin tant que cal asagat.
Tanlèu sa femna mòrta,
coma èra de mal viure aqui mai de sadol,
Tretze clavèt sa pòrta
e i virèt lo cuol.